الى صديقي شربل بعيني بعيد ميلاده الستين 2011
ستّين صرنا والعمر مشوار
وتشرين لوّح بالتلج خصلاتنا
والقمح عالبيدر غمار غمار
غلّة سنين الخير من كرماتنا
ونبيذنا تعتّق بقلب جرار
خوابي انسقت كل يوم من دماتنا
ولمّن يا شربل لعبت الأقدار
وغاب الوليف ومطّرت غيماتنا
ثار النبيذ وفجّر الفخّار
وكسّر قيود الحب من ديّاتنا
وتاري اللي حبّوا كلهن تجار
طمعوا بكم حجره من جنيناتنا
إرجع يا شربل فجّر الأشعار
تنسمّع العالم صدى كلماتنا
(كل عام وحبيبي شربل بخير)
**
