ـ1ـ
شعرك من وحي الديّان
دفقة نور "ونفحة صُور"..
من لحنو رقّ الصوّان
وشنّف آذانو المعمور
نبرة شربل.. هالإنسان
ما فيها كذب ولا زور
ـ2ـ
فيك اجتمعت كل الناس
زهر مكلّل فوق الراس
شعرك عابق بالاحساس
أسمى من ريحان وآس
كلماتك در وإلماس
وشمعه بكنيسه ونبراس
ـ3ـ
مزمورك.. مزمور الربّ
يا شربل.. خمره بعنقود
هيدا اللي ضاعْ وما انضبّ
وفلّت من نهدة داؤد
تخبّى بالغيم الما انصبّ
وشعشع برق.. وصاح رعود
ـ4ـ
زبدة حق ونقطة زات
مضغتها عقول وأفكار
منها بالفهم تغدّات
معنى وأسرار وأنوار
جسمك، يا شربل، لو مات
بيطلع أعشاب وأزهار
ـ5ـ
يا شربل.. انت وجدان
قلبك ابيض متل الفل
واحد في صورة إنسان
لكن فيك لمحت الكل
شعرك إيمان وغفران
وما في بقلبك حبّة غلّ
ـ6ـ
الماضي أخبار وأنفاس
بيحلم يحكي من شفافك
قلب الحق، ورب الناس
بدّو يجمّل أوصافك
وبيعطيك الربّ الكاس
يوم الحشر.. بإنصافك
ـ7ـ
نجوى القلب وصوت النفس
فوق الوعي وبعد الحسّ
شفت "بعيني" خلف الهمس
بسمة بدر وغرّة شمس
وشيخ بيلبس بدلة قسّ
ومن قرآني بيلقي الدرس
ـ8ـ
عمق الفكره وضّحتا
بقشر اللفظه واللهجه
والمعاني لبّستا
أحلى ألوان وبهجه
بروح المنطق دعّمتا
وبعد المنطق.. بالحجّه
ـ9ـ
بحبّ اللهجه تطربني
بالفصحى العربيّه
لكن شربل حبّبني
بهيدي اللهجه المحكيه
صاد المعنى العاجبني
من بحر النورانيّه
ـ10ـ
غنّى البلبل.. صحّاني
صوتو من عالم تاني
لحنو مغنى ربّاني
تَراتيل.. ومشّاني
لما سمعتو.. وناجاني
صار إنجيلو قرآني
ـ11ـ
علي.. كلمه مشلوحه
نجوم وأفلاك وأنوار
بتتمرجح بالمرجوحه
فيها.. وبترقص أقمار
ودورة شمس المجروحه
بتعطي بالتحريك نهار
ـ12ـ
علي.. كلمه عم تدمع
من جدول عيسى بتنبع
صورة صليبو أربع
ومريم من تحتو بتركع
بتبكي والكون بيسمع
ومن شكواها بيتوجّع
ـ13ـ
علي.. كلمة حزن وصبر
فيها تشبّح معنى السر
شق الغيب بعين الفكر
وصار الغيب بعينو جهر
ردّ الشمس وشقّ البدر
لكن نكروا.. وقالوا: سحر
ـ14ـ
لمعة سيفو قبلة نور
مرسومه بشفاف الشمس
ونهج البلاغه دستور
علم الغدّ وأمس الأمس
مهما طمّس أهل الزور
بيتوهّج من تحت الطمس
ـ15ـ
ضربة عيسى عَ خدّو
حنّطها الربّ بصبرو
وبأحمد حقّق بعدو
وأخد بعلي ثأرو
مهما بأوصافو عدّوا
الخابي ما بتحصر بحرو
ـ16ـ
نقطة زيت بزيتونه
ونخله في عجوة بلحه
ونون الكاف المكنونه
قبل المسره والفتحه
لولا "الهوّ" والدينونه
ما في سطر ولا صفحه
ـ17ـ
نقطة فيض الملكوت
صفار البيضة قبل النقف
ودفقة أنوار اللاهوت
قبل الكرمه.. خمرة صِرف
وضرب الرابع بالتالوت
تنعشر وجه بردّة طرف
ـ18ـ
صفر الواحد هالجاري
يوحنّا بنهرو تعمّد
ومن عيسى سرّو الساري
فيه الغايه والمقصد
مطلق جوهر الباري
بصورة ناسوت تجسّد
ـ19ـ
إقرع إقرع يا ناقوس
صوت الحقّ بدقاتك
بلكي بيفيق الناموس
وبيصحى من رناتك
ونفوس تكعنش بنفوس
وتتبع ممشى خطواتك
ـ20ـ
كم سقراط.. وكم مسيح
صاغ الحق بكلماتو
ماتوا من قتل وتجريح
وعند الخالق ما ماتوا
لسان الدهر بصوت الريح
ردّد عنهم نبراتو
ـ21ـ
أنا يا شربل إنسان
بهتف بالانسانيه
بودّي تجتمع الأديان
باقه في مزهريّه
بوذي ويهودي إخوان
وإسلام ومسيحيه
ـ22ـ
أللـه واحد.. جزّأناه
أللـه مش سبعه تماني
قطّعناه وخرّطناه
متل الحلوى بصواني
عفوك يا ربي.. غوثاه
بهالتجّار الدياني
ـ23ـ
علي سنّي بمحمّد
وأنا علوي بعلي
وعيسى من خلفو صعّد
وموسى وهارون بْوالي
قلبي بالكل توحّد
وحالك يا شربل حالي
ـ24ـ
يا مهدي.. الغيبه طالت
حلاّ هالرجعه حلاّ
جمّع هالفكرو فالت
وصرّح للناس وقللاّ:
معبودي واحد ثابت
وأنا هالرسل كلاّ
ـ25ـ
هوني بيتفاجأ هالحب
نبي اعتبرو وحداني
بيتعجّب كيف كره وسبّ
محبوبو بشخصو التاني
الما توحّد قلبو بالحبّ
قلبو ناري وشيطاني
ـ26ـ
هيدا حبي وتعبيري
وتمجيدي مع تعطيري
رسمتك لوحه بتفكيري
بسمة فجر بتصويري
بتستاهل مني.. وغيري
حبّي وحبّو.. وتقديري
**
